घरमै बनाउनोस् यी मिठा परिकार

चिकन अचार

आवश्यक सामग्री

बोनलेस चिकन– आधा केजी, तोरीको तेल– ४० एमएल, मेथी– आधा चिया चम्चा, अदुवा– १५ ग्राम, लसुन– २० ग्राम, सुकेको खुर्सानी– ६ वटा, सोप– एक चिया चम्चा, तोरीको दाना– एक चिया चम्चा, नुन– स्वादअनुसार, जिरा (गेडा)– ७ ग्राम, धनिया(गेडा)– १० ग्राम, इम्ली या कगतीको रस– २५ एमएल, भेनेगर– ७ एमएल, मरिचको दाना– एक चिया चम्चा ।

बनाउने तरिका

सर्वप्रथम चिकनलाई डाइस या स्ट्रिप कटमा काट्ने । त्यसपछि नुन, बेसार र कागती मोलेर तातेको तोरीको तेलमा मजाले (खौरो हुनेगरी) भुट्ने । ब्राउन कलरको हुनासाथ झाँजरले छानेर एक साइडमा राख्ने ।

अर्को सुख्खा प्यानमा सुकेको डल्ले खुर्सानी, मरिच, धनिया, जिरा, मेथी, तोरी, टिमुर हालेर फ्राई गर्ने । त्यसलाई हल्का चिसो हुन दिएपछि सिलौटो या ब्ल्यान्डरमा पिस्ने र एक साइडमा राख्ने ।

तातेको तोरीको तेलमा मसिनो गरी काटेको अदुवा–लसुन फुराउने र ब्राउन हुनासाथ हिट कम गर्ने । त्यसपछि पिसेको मसला हालेर केहीबेर पकाउने अनि रोस्ट गरेको चिकन हालेर चलाउने ।

अब यो चिसो हुनासाथ भिनेगर, कागतीको रस र इम्लीको झोल हालेर मिक्स गर्ने । त्यसपछि यसलाई हावा नछिर्ने सुख्खा सिसीमा हालेर कोठाको सामान्य तापक्रममा राख्ने । यही विधिबाट कुखुराको मासुको मात्र नभई बफ, टर्की, बङ्गुर, अस्ट्रिच, खसी, झिँगे माछा इत्यादिको समेत अचार बनाउन सकिन्छ ।

यसलाई तीनदेखि छ महिनासम्म उपभोग गर्न सकिन्छ । चिकन अचारलाई उक्त सिसीबाट निकालेर उपभोग गर्दा सुख्खा र सफा काठ या स्टिलको चम्चा प्रयोग गर्नुपर्छ ।

०००

टर्कीको छोइला (नेवारी शैलीको)

आवश्यक सामग्री

हड्डी नभएको टर्कीको मासु– आधा केजी, सुकेको खुर्सानी– ४ देखि ६ वटा, अदुवा– १५ ग्राम, लसुन– ३० ग्राम, तोरीको तेल– १५ एमएल (या ३ चिया चम्चा), मेथी– आधा चिया चम्चा, टिमुरको धुलो– आधा चिया चम्चा, हिमाली नुन– स्वादअनुसार, पोलेको गोलभेंडा– ३ वटा, हरियो लसुन– २ पोटी, धनिया– आधा मुठा, बेसार– आधा चिया चम्चा, टिमुरको तेल– २ थोपा ।

बनाउने तरिका

काटेको टर्कीलाई थोरै नुन र बेसार हालेर डाइस या स्ट्रिपमा हल्का बफ्याउने र छान्ने । त्यसपछि केहीबेर सुख्खा गरेर प्यान या ग्रिलरमा राम्ररी डाम्ने र एक साइड लगाएर केहीबेर त्यत्तिकै राख्ने । अब सुख्खा प्यानमा सुकेको खुर्सानी र टिमुरलाई भुटेर एक साइडमा राख्ने ।

त्यसपछि लसुनको केस्रा छुट्याउने र बोक्रासहित पोल्ने, अदुवालाई पनि बोक्रासहित आगोको ज्वालामा पोल्ने र दुवैलाई पखाल्ने । त्यसपछि स–साना गोलभेंडालाई पनि पोलेर निकाल्ने ।

अब भुटेको तोरीको तेलमा पोलेको लसुन, पोलेको खुर्सानी, टिमुर र गोलभेंडालाई सिलौटो या ब्ल्यान्डरमा मजाले पिस्ने । यसरी बनेको मसलालाई ‘छोइला मसला’ पनि भनिन्छ । (गोलभेंडा नहाली पिस्ने हो भने यो मसलालाई लामो समयसम्म प्रयोग गर्न पनि सकिन्छ ।)

मसला तयार पारिसकेपछि डामेको टर्कीको मासुमा हिमाली नुन र छोइला मसला हालेर मजाले मुछ्ने । त्यसपछि तोरीको तेलमा मेथी र बेसार झान्ने । अन्तमा, काटेको हरियो लसुन र धनिया हालेपछि नेवारी शैलीको टर्कीको छोइला तयार भयो ।

यसलाई स्न्याक्स या खाजाका रूपमा ताइचिन चिउरासँग खान सकिन्छ । यो विधिबाट टर्कीको मात्र नभई चिकन, मटन, हाँस, पनीर, तोफु, मस्यौरा, निउँरो, च्याउ, माछा, झिँगे माछा, कालिज, अस्ट्रिचलगायतको पनि छोइला बनाउन सकिन्छ ।

०००

हेल्दी इम्युन जुस

आवश्यक सामग्री

चुकन्दर– १५० ग्राम, फुजी स्याउ– २५० ग्राम, गाजर– ३०० ग्राम, तुलसी– सानो मुठा, कागतीको रस– २ चिया चम्चा, कालो मरिचको धुलो– १ पिन्च, कालो नुन– स्वादअनुसार ।

बनाउने तरिका

माथि उल्लेखित सामग्रीमध्ये स्याउ, चुकन्दर र गाजरलाई राम्ररी सफा गरेर स–साना चाना पारी काट्ने । ती चानाहरूमा तुलसी समेत मिसाएर जुसर या ब्ल्यान्डरमा पेल्ने ।

त्यसपछि छानेर कागतीको रस, मरिचको धुलो र स्वादअनुसार कालो नुन हालेपछि इम्युन जुस तयार भयो । चुकन्दर र गाजरलाई ताछेर जुस निकालिएको भए छान्नु पनि पर्दैन ।

यो जुस दिनहुँ बिहान एक गिलास पिउनाले रोग प्रतिरोधात्मक शक्ति धेरै हदसम्म वृद्धि हुन्छ । युवा– युवतीले ३५० देखि ४०० एमएलसम्म र बालबालिका या वृद्ध–वृद्धाले २५० देखि ३०० एमएलसम्म यो जुस पिउनु उत्तम मानिन्छ । यही तरिका अपनाएर सुन्तला, किबी, मौसम, भोगटे, पाइनापल, वाटरमेलन, पपैयाको पनि जुस तयार पारी स्वाद फेर्दै पिउन सकिन्छ ।