एभोकाडो, खर्बुजा र आरू: यौनमा योगदान

शरीरमा प्रोटिन, कार्बोहाइड्रेड, बोसोलगायतका सूक्ष्म पोषक तत्व सन्तुलितरूपमा मिलेर रहनु आवश्यक हुन्छ । शरीरको समग्र सक्रियताका निम्ति अत्यावश्यक यस्ता पोषक तत्व सन्तुलितरूपमा मिलेको खण्डमा शारीरिक तथा मानसिकरूपमा स्वस्थ तथा हृष्टपुष्ट रहनुका साथै यौनजीवन समेत आनन्दित तथा सुखमय हुन्छ ।

यौनानन्दका लागि स्वस्थ फलफूल निकै लाभदायक हुन्छन् । नियमित तथा सन्तुलितरूपमा फलफूल खाएमा शारीरिक तथा मानसिक स्फूर्ति बढ्छ । शारीरिक एवम् मानसिक स्फूर्ति बढेपछि यौन सक्रियता र सक्षमता पनि उत्तिकै बढ्ने कुरा स्वाभाविक हुन्छ ।

ताजा तथा सुख्खा फलफूल यौनवर्द्धक हुन्छन् । यस्ता फलफूल नेपालमा पर्याप्त मात्रामा पाइन्छन् । शारीरिक तथा मानसिकरूपमा स्वस्थ रहनका लागि मात्र होइन, सुखद् यौनका लागि समेत नियमितरूपमा फलफूल खानु जरुरी हुन्छ । मौसमी ताजा फलफूल प्राथमिकताका साथ खाने गर्नुपर्छ । सकभर मौसमअनुसारका फलफूल खानु नै उपयुक्त हुन्छ ।

एभोकाडोको लाभ

फलफूलहरूमध्ये केहीचाहिँ विशेषरूपमै यौनवर्द्धक खालका हुन्छन् । एभोकाडोलाई उदाहरणका रूपमा लिन सकिन्छ । नियमित तथा स्वस्थ यौन सम्पर्कका लागि फोलिक एसिड र भिटामिन बी– ६ अत्यावश्यक हुन्छन् । फोलिक एसिड ऊर्जावर्द्धक हुन्छ; भिटामिन बी– ६ ले यौनजन्य हर्मनलाई सन्तुलित राखिराख्न मद्धत पुर्‍याउँछ ।

नियमति तथा सन्तुलितरूपमा एभोकाडो खाँदा यौनजन्य हर्मन स्थिर बनाउन मद्धत मिल्छ । यसो हुँदा यौन क्षमता बढ्दछ । सामान्यतया बिहान एउटा र बेलुकी एउटा गरी दैनिक दुई दाना एभोकाडो खाँदा शारीरिक, मानसिक तथा यौन सक्रियताका निम्ति निकै नै लाभ मिल्छ ।

ऊर्जा दिने खर्बुजा

खर्बुजा पनि यौनवर्द्धक फलफूल नै हो । नियमित तथा सन्तुलितरूपमा खर्बुजा खानाले पुरुषको यौनाङ्ग मजबुत तुल्याउन मद्धत मिल्छ । नियमितरूपले खर्बुजा खाँदा पुरुष–महिला दुवैमा कामोत्तेजना बढाउन समेत राम्रो मद्धत मिल्छ ।

खर्बुजामा सेट्रोलिन नामक पोषण तत्व पाइन्छ, जसले एमिनो एसिड निष्कासन गर्छ । खर्बुजा खानाले शरीरमा अर्गानिक पोषण तत्व निष्कासन हुने भएकाले यो फल नियमित तथा सन्तुलितरूपमा खाँदा निकै लाभ मिल्छ ।

अर्गानिक पोषण तत्वबाट रक्तकोषिका स्वस्थ बनाउन मद्धत मिल्छ । मौसमअनुसार सामान्यतः दैनिक एक टुक्रा खर्बुजा खाएमा स्वास्थ्यका निम्ति राम्रै मद्धत पुग्दछ । यस फलले शरीरलाई राम्रैसँग ऊर्जा प्रदान गर्दछ । शारीरिक तथा मानसिकरूपमा स्वस्थ भएपछि यौन सक्रियता त हुन्छ नै ।

खर्बुजाले शरीरमा पुनर्ताजगी भर्न समेत सहयोग पुर्‍याउँछ । प्रायः गर्मी याममा नै खर्बुजा खाइन्छ । यसमा पानीको मात्रा प्रशस्त हुने र स्वादिलो समेत हुने भएकाले यसको महत्व गर्मी मौसममा नै बढी हुन्छ ।

आरूको लाभ

आरू पनि यौनवर्द्धक फलफूल हो । सन्तुलितरूपमा आरू खाँदा पुरुषमा शुक्रकीटको मात्रा बढ्दछ । आरूमा पाइने भिटामिन– सीका कारण शुक्रकीटको मात्रा बढ्न जान्छ । आरूमा पाइने भिटामिन– सीले महिलामा डिम्बको मात्रा बढाउन समेत राम्रै मद्धत पुर्‍याउँछ ।

आरूमा पाइने तत्वले शुक्रकीट र डिम्बको गुणस्तर कायम राख्न समेत सहयोगी भूमिका खेल्दछ । सन्तुलित तथा नियमितरूपमा आरू खाँदा कामोत्तेजना बढाउन पनि मद्धत मिल्छ ।