सुन्दर आम्स्टर्डम
स्मृतिमा नेदरल्याण्ड
डा. डीबी सुनुवार
यात्रा आफैंमा रोचक हुन्छ । यात्राको सुरुआत जति आनन्ददायी हुन्छन् । यात्रा जति रोचक र आनन्ददायी हुन्छन्, यसका त्यति नै चुनौती समेत हुन्छन् । यात्रा गर्दा अनेकौं फरक–फरक ठाउँ, परिवेश, सरसङ्गत र हावापानीमा तन–मन घुलमिल हुनुपर्ने हुन्छ ।
खुसीको तिर्खा लागेपछि नै हो सामान्यतः यात्रा गर्ने । कुनै यात्रामा धीत मर्ने गरी तिर्खा मर्छ त कुनै यात्रामा त्यो सम्भव नहुन पनि सक्छ । तर, जेहोस्– यात्रा हुन्छ खुसीकै खोजीका लागि ।
यात्राको छनोटका क्रममा आज युरोपको मध्यभागमा अवस्थित एउटा सुन्दर मुलुक परेको छ । युरोपियन मुलुक नेदरल्याण्डको आम्स्टर्डम परेको छ आजको छनोटमा ।
आम्स्टर्डम इन्टरनेसनल एयरपोर्टमा ल्याण्ड भएको छ जहाज । युरोपको व्यस्त एयरपोर्टमध्येमा पर्दछ यो विमानस्थल ।
बिहानको झुल्के घाममा छौं हामी । प्लेनबाट झरेर कडा इमिग्रेसन जेकजाँच पासपछि बाहिरियौं एयरपोर्टबाट । आम्स्टर्डम सिटी भ्रमण गराउने गाइड आइसकेका छन् एयरपोर्टबाहिर ।
भ्यानमा चढेर गाइडसँग अगाडि बढ्छ यात्रा । एउटा सङ्ग्रहालयमा पुगिन्छ, करिव बीस मिनेटपछि । सङ्ग्रहालयको नाम हो– ‘भ्यानगग’ । भ्यानगगको नामबाटै राखिएको रहेछ जुन सङ्ग्रहालयको नाम । संसारकै दुर्लभ गरगहना, हिरा–मोति, ढुङ्गालगायतको दृश्यावलोकन गर्न पाइयो यो सङ्ग्रहालयमा ।
कम्ति रोचक छैनन् सङ्ग्रहालयमा सङ्ग्रहित नाङ्गा पेन्टिङ र स्ट्याचु । मनै तानिरहने खालका दृश्यहरू । विश्व सम्पदा सूचीमा सूचीकृत यस सङ्ग्रहालयको दृश्यावलोकनले मनै तानिरह्यो । करिव एक घन्टा अवलोकन गरियो यस सङ्ग्रहालयमा ।
सङ्ग्रहालय अवलोकनपछि पुगियो ड्याम स्क्वायरमा । खुला सङ्ग्रहालयजस्तै लाग्दछ यो ठाउँ । क्यानलको किनारमा अवस्थित ड्याम स्क्वायरमा लेखिएको छ– ‘आई लभ आम्स्टर्डम’ ।
फोटो खिँच्नेहरूको भीड नै लागेको छ । मैले पनि लिएँ दुई–चार स्न्याप । एकदमै सुन्दर र व्यवस्थित साइकल लेन छन् ड्याम स्क्वायर क्षेत्रमा । साइकल कुदाउन र हिँडडुल गर्न निकै आनन्ददायी ठाउँ छ यो ।
अनौठा–अनौठा दृश्य देख्न पाइने नेदरल्याण्डको राजधानी आम्स्टर्डम सहर निकै सुन्दर छ । मूलतः डचहरूको ऐतिहासिक तथा सांस्कृतिक वैभवको आनन्द लिन पाइने यो ठाउँ कम्ति रोचक छैन ।
आफैं कमाउने र आफैं खाने प्रचलन छ डचहरूको । आफ्नै कमाइबाट इच्छाअनुसार खानपान गर्ने डच प्रचलनले आकर्षित गर्छ हाम्रो ध्यान । आफैं कमाएर आफैं खानु छ भने ‘गो फर डच’ भन्ने गरिन्छ ।
हाम्रो यात्रा ड्याम स्क्वायरपछि अघि बढ्छ मिनी आम्स्टर्डमतर्फ । आम्स्टर्डमको विषयमा जानकारी लिनका निम्ति यो नै उपयुक्त ठाउँ हो । एउटा खुला सङ्ग्रहालय नै हो मिनी आम्स्टर्डम पनि । सानो ठाउँ भए तापनि धेरै विषयवस्तुको दृश्यावलोकन गर्न पाइन्छ यस ठाउँमा ।
मिनी आम्सर्टर्डममा नेदरल्याण्डकै समग्र दृश्यावलोकन गर्दाको प्रसङ्ग कम्ति रोचक छैन । अघि एयरपोर्टमा भेटिएका पाँच भुटानीसँग यहींको दृश्यावलोकनका क्रममा फेरि भेट भयो । कृषि अध्ययनका लागि उनीहरू त्यहाँ पुगेका रहेछन् ।
कृषिक्षेत्र र पेशाको आधुनिक एवम् व्यावसायिक विकास तथा अध्ययनमा निकै ठूलो भूमिका रहेछ नेदरल्याण्डको । फूल उत्पादन गर्ने संसारकै ठूलो मुलुकमध्येमा गनिन्छ नेदरल्याण्ड । रङ्गीबिरङ्गी टुलिफ गार्डेनको दृश्यावलोकन गरियो ।
नेदरल्याण्डमा भएको कृषि क्षेत्रको विकास, आधुनिक खेतीपाती तथा फूल खेतीका क्रममा अपनाइने प्रविधिलगायतबारे धेरै कुरा सुनाए अध्ययनका लागि पुगेका ती भुटानीहरूले । समुद्री सतहभन्दा तलको भूभागमा अवस्थित मुलुक हो नेदरल्याण्ड । यस मुलुकको एकातर्फको समुद्री किनारमा निकै ठूलो ड्याम छ ।
नेदरल्याण्को अर्को ‘विशेषता’ हो– ‘फ्री सेक्स’ सहरका रूपमा चिनिने आम्स्टर्डमको पहिचान । एकदमै स्वतन्त्र तर व्यवस्थित यौनानन्द लिन चाहनेहरूका लागि निकै आकर्षक सहर हो आम्स्टर्डम । युरोपीयन मुलुक नेदरल्याण्डको रोचक पक्ष नै हो ‘फ्री सेक्स’ । संसारभरका धेरैजसो मुलुकमा कानुनी बन्देज छ ‘सेक्स टुरिज्म’ माथि । तर, नेदरल्याण्डको आम्स्टर्डममा भने छैन त्यस्तो बन्देज ।
क्यानलै क्यानलको सहरका रूपमा समेत परिचित छ आम्स्टर्डम । ती क्यानलहरूमा चल्ने स–साना क्रुजहरू पनि चढियो । समग्रतामा भन्नुपर्दा आम्स्टर्डमको सुन्दरतामा दृश्यावलोकन गरियो धीत मरुन्जेल ।
खानपान सुरु हुन्छ । टिपिकल डच रेस्टुराँमा स्थानीय (डच) खाना खाइयो । सो ठाउँमा करिव तीन सय वर्षअघि नै ‘हेनिकन’ बियर उत्पादक कम्पनी खुलिसकेको जानकारी गाइडले गराए । सो कम्पनीले उत्पादन गरेको बियर संसारभरकै प्रायः मुलुकमा पुगेको रहेछ ।
नेदरल्याडको तीनदिने रोचक यात्रा टुङ्ग्याइयो । आम्स्टर्डमको सुन्दर यात्रा–स्मृति मनभरि सजाउँदै अर्को यात्राका निम्ति बेल्जियमतर्फ लागियो ।